Polisi ya Malawi yataye muri yombi Umunyarwanda witwa Donald Dawayezi akaba ari uwa kabiri ukekwaho Jenoside ufatiwe muri iki gihugu nyuma ya Vincent Murekezi wafashwe mu mezi abiri ashize.
Uyu mugabo w’imyaka 42 y’amavuko, ufite pasiporo ya Malawi, yafatiwe muri Zimbabwe nyuma yo gutorokerayo amaze kuriganya abahinzi umusaruro yajyaga acuruza.
Yafashwe n’Urwego rushinzwe abinjira n’abasohoka muri Zimbabwe ashyikirizwa Malawi nk’uko Nyasatimes ibitangaza.
Umuvugizi wa Polisi ikorera mu Mujyi wa Lilongwe, Kingsley Dandaula, yameje amakuru y’itabwa muri yombi rya Dawayezi.
Ati “ Yari umucuruzi w’umuceri, ibishyimbo, ibigori na soya. Nyuma yo kwakira ibirego byinshi twafatanyije na Zimbabwe iramufata iramudushyikiriza.”
Kugeza ubu umubare w’amafaranga yariganyije abaturage bamuhaga umusaruro nturashyirwa ahagaragara nk’uko uyu muyobozi yakomeje abisobanura.
“Turamushinja uburiganya mu kubona ibicuruzwa akaba azagezwa imbere y’ubutabera mu gihe iperereza rizaba rirangiye.
Kugeza ubu ntibirasobanuka neza niba koko Dawayezi yaragize uruhare muri Jenoside yakorewe Abatutsi muri Mata 1994, ndetse n’imyirondoro ye yose ntiramenyekana.
