Myugariro w’ikipe y’igihugu y’u Rwanda Amavubi, Rwatubyaye Abdoul yatangiye neza mu ikipe ye nshya ya FC Shkupi yo mu gihugu cya Macedoni mu mukino ikipe ye yaraye ikinnye na Sileks ndetse banawutsinda igitego kimwe ku busa.
Wari umukino wa shampiyona w’umunsi wa 21 mu gihugu cya Macedoni ndetse ukaba umukino wa kabiri kuri Rwatubyaye utarabashije gukina umukino wa mbere nubwo yagaragaye k’urutonde rw’abakinnyi 18 ikipe ye ya FC Shkupi yari yitabaje banganya ubusa ku busa na FC UFA mu mpera z’icyumweru gishize.
Muri uwo mukino waraye ubaye ukanarangira FC Shkupi yegukanye intsinzi y’igitego kimwe ku busa wanatumye iyi kipe irara ku mwanya wa kabiri ku rutonde rwa shampiyona aho bafite amanota 40 mu mikino 21 bamaze gukina, uru rutonde rukaba ruyobowe n’ikipe ya Shkendija ifite amanota 46.
Myugariro Rwatubaye Abdoul yageze mu ikipe ya FC Shkupi yo mu cyicirio cya mbere cyo mu gihugu cya Macedoni avuye mu ikipe ya Corolado Switchbacks yo muri leta z’Unze Ubumwe z’Amerika aho yahavuye amaze gusoza amasezerano y’imyaka ibiri nubwo yagiye atizwa mu makipe atandukanye yo muri icyo gihugu.
Rwatubyaye Abdul w’imyaka 24 y’amavuko yakiniye amakipe atandukanye mu Rwanda, harimo APR FC batandukanye muri 2016 yerekeza muri Rayon Sports nayo baje gutandukana mu ntangiriro za 2019 ubwo yerekezaga muri Amerika.
