Shampiyona y’ikiciro cya mbere mu bagabo mu Rwanda irakomeza hakinwa umunsi wayo wa 10, mu mukino itegerejwe kuri uyu munsi utangira gukinwa kuri uyu wa gatatu, tariki ya 22 Ukuboza 2022, Rayon Sports irakira Police FC I Nyamirambo.
Uyu munsi urakinwa hatemewe abafana ku bibuga nk’uko amabwiriza ya Minisiteri ya Siporo yabitangaje mu rwego rwo kwirinda ikwirakwira ry’icyorezo cya Koronavirusi ikomeje kwiyongera mu bice bitandukanye by’Isi.
Kuri uyu munsi, ikipe ya Rayon Sports yamaze guhagarika abakinnyi babiri aribo Mitima Isaac ndetse na Habimana Huseein uzwi nka Eto’o kubera imyitwarire itari myiza ngo bagaragaje irakira ikipe ya Police FC iherutse gutsinda Etincelles FC ibitego 3-0.
Uyu mukino uri bukinwe ku isaha ya saa cyenda n’igice urabanzirizwa n’uwa Gorilla FC yakira ikipe ya Mukura VS nawo ubera kuri sitade ya Kigali, Mukura igiye gukina uyu mukino idafite OPOKU William wahagaritswe kubera amakarita amubuza kugaragara kuri uyu munsi.
Mu yindi mikino ihari, ikipe ya Etoile de l’Est yo mu karere ka Ngoma irakira ikipe y’ingabo z’igihugu ya APR FC.
Ni umukino iyi kipe yo muntara y’i Burasirazuba yahize gutsinda APR FC nkuko babitangaje binyuze ku rubuga rwabo rwa Twitter, bagize bati ” APR FC muze mwikandagira inzira si nyabagendwa.”
Muri rusange uko umunsi wa 10 ukinwa:
Kuwa gatatu, tariki ya 22 Ukuboza 2021:
Musanze FC vs Marine FC, Ubworoherane Stadium – 15.00
Etoile de l’Est vs APR FC, Ngoma Stadium – 15.00
Etincelles FC vs Gicumbi FC, Umuganda Stadium – 15.00
Gorilla FC vs Mukura VS&L, Kigali Stadium – 12.30
Rayon Sports FC vs Police FC, Kigali Stadium – 15.00
Kuwa kane, tariki ya 23 Ukuboza 2021:
Espoir FC vs Bugesera FC, Rusizi Stadium – 15.00
Gasogi United vs AS Kigali, Kigali Stadium – 12.30
Kiyovu SC vs Rutsiro FC, Kigali Stadium – 15.00
