Amarushanwa ya Beach Volley (Volleyball ikinirwa ku musenyi) asanzwe aba buri mwaka azaba tariki ya 10 kugeza 11 Nzeli 2016 mu Karere ka Rubavu.
Hatumimana Christian, Umunyamabanga Nshingwabikorwa mu ishyirahamwe ry’umukino wa Volleyball mu Rwanda (FRVB) yabwiye izubarirashe.rw ko iri rushanwa ryitabirwa n’abantu b’ingeri zitandukanye ndetse n’ibyiciro bitandukanye barimo ababigize umwuga n’abakanyujijeho.
Akomeza avuga ko buri kipe iziyandikisha isabwa gutanga ibihumbi 10 ndetse bitarenze tariki ya 1 Nzeli uyu mwaka.
Ubusanzwe iri rushanwa ritwara ingengo y’imali ya 6 z’amafaranga y’u Rwanda atangwa na Special Guarantee Fund.
Uko amakipe yitwaye mu mwaka wa 2015
Ikipe yegukanye umwanya wa mbere mu bagabo yari igizwe na Ntagengwa Olivier na Kavalo Patrick batsinze Rulinda Déo na Masizo Uziel ku maseti 2-0 , mu bakobwa Nzayisenga Charlotte na Mutatsimpundu Denyse batsinda Ernestine na Grace amaseti 2-0.
Mu bakuze (abagabo) : Nyirimana Fidèle na Iyabato Ignace batsinze Masumbuko Jean de Dieu na Kansiime amaseti 2-0
Mu bagore bakuze, Kubwimana Gertrude na Bitukuze Scholastic batsinda Umutesi Josée na Iribagiza Alice amaseti 2-1.
