Kuri uyu wa gatandatu tariki ya 15 Mutarama 2022, hakinwaga imikino y’umunsi wa 12 nyuma yaho shampiyona yari yasubitswe, mu mikino yaraye ikinwe As Kigali yatsinzwe na Rutsiro FC naho Rayon Sports yo inganya na Musanze FC ubusa ku busa.
Mu mukino wabanjirije iyindi wabereye kuri Sitade ya Kigali Nyamirambo, ikipe y’umujyi wa Kigali ariyo ya As Kigali yatsinzwe na Rutsiro Fc ibitego 2-1.
Muri uyu mukino ikipe ya Rutsiro niyo yafunguye amazamu ubwo hari ku munota wa 30 w’umukino, ni igitego cyatsinzwe na Hamza Nkubito.
Iki gitego cyishyuwe na Rutahizamu wa As Kigali ariwe Hussein Shaban Shabalala ubwo hari ku munota wa 78, ni igitego yatsinze kuri Penaliti.
Igitego cy’itsinzi ku ruhande rwa Rutsiro FC cyatsinzwe na Jules Watanga Shukulu ubwo hari ku munota wa 81.
Umukino ikipe ya Rutsiro FC yaraye itsinze wabaye umukino wa 3 muri shampiyona y’uyu mwaka itsinze.
Ku ruhande rwa As Kigali, igitego Rutahizamu Shaban Hussein yaraye atsinze mu mukino wa 3 wikurikiranya, ari nako yuzuza ibitego 7 muri iyi shampiyona y’u Rwanda.
Mu yindi mikino yaraye ibaye ya shampiyona y’u Rwanda yakinwaga ku munsi wa 12, ikipe ya Rayon Sports yaraye inganyije na Musanze FC ubusa ku busa ari nako byagenze ku w’undi wahuje ikipe ya Espoir FC na Etoile de l’Est.
Kuri iki cyumweru imikino irakomeza aho ikipe ya Gorilla FC yakira ikipe ya Bugesera FC naho Kiyovu SC yo ikine na APR FC.
Kuri uyu wa mbere ikipe ya Gasogi United FC izakira ikipe ya Gicumbi FC naho Mukura VS izakire ikipe ya Police FC.
