Kuri uyu wa gatanu tariki ya 11 Ugushyingo 2022, guhera ku isaha ya saa kumi n’ebyiri z’umugoroba kuri Sitade ya Kigali i Nyamirambo hazabera umukino wa cyenda wa shampiyona uzahuza Kiyovu SC na Rayon Sports.
Ikipe ya Kiyovu SC niyo izakira uyu mukino, kugeza ikba yamaze gutangaza ko kwinjira ari amafaranga ibihumbi mirongo itanu mu myanya y’icyubahiro ndetse n’amafaranga ibihumbi bitanu mu myanya isanzwe.
Nk’uko bigaragara ku ifoto yerekana ibiciro byo kuri uyu mukino yashyizwe hanze bigaragara ko uzaba ari mu myanya y’icyubahiro ya VVIP ari ukwishyura ibihumbi 50 Frw, naho mu nkengero z’imyanya y’icyubahiro akaba ari amafaranga ibihumbi 25 Frw.
Mu myanya y’ahatwikiriye ho kuhicara ni ukuba umuntu yaguze itike y’ibihumbi icumi ndetse n’amafaranga ibihumbi bitanu ahadatwikiriye hazwi ku izina ry’ahasigaye hose.
Uyu mukino ugiye gukinwa, Rayon Sports iri ku mwanya wa mbere ku rutonde rw’agateganyo rwa shampiyona aho ifite amanota 18 naho Kiyovu SC yo ikagira amanota 17 ikaba iri ku mwanya wa Kabiri.
Mu mikino ine imaze guhuza aya makipe yombi, Kiyovu SC imaze gutsinda imikino itatu naho Rayon Sports izwi nka Gikundiro yo ikaba yaranganyije umukino umwe gusa.
