Itsinda ry’abahanzi Charly na Nina baririmbye indirimbo zirimo Itiro ry’Inka ya Bahaga umwe mu bahanzi ba kera bo mu Burundi.
Ni mu gitaramo gikomeye aba bahanzi nyarwanda bakoreye mu Burundi, kuri uyu wa 25 Ukuboza 2016, ahitwa Lacosta Beach, kuri Kibenga Lac mu Mujyi wa Bujumbura.
Ni igitaramo cyari cyitezweho byinshi, aho bwa mbere itsinda rya Charly na Nina ryagiye gutaramira muri iki gihugu. Charly yari yambaye utwenda tugufi; agakabutura gato k’umukara kerekana uko ateye n’amaguru yose hamwe n’agapira kagufi nako kagaragaza umukondo. Yari yarengejeho agapira k’umutuku kagufi k’indondo gasa nk’ak’imbeho.
Na Nina ni nk’uko nawe yari yambaye, gusa batandukanira ku mabara kuko we ubururu n’umweru.
Mbere yo kuririmba indirimbo bakunzweho cyane muri iki gihugu Nina wo muri iri tsinda yabanje kubaza Abarundi bari bitabiriye iki gitaramo ati “Mbere y’uko turirimba Agatege n’Indoro nta zindi mushaka ko tubaririmbira?” bose batera hejuru baririmba bati “Agatege!!!”
Nuko Nina agira ati “Sawa, sawa, tugende. Indoro n’Agatege turaziririmba,” nuko bahita baririmba iyitwa ‘Amabaruwa’ ya Muganwa Desire ari we Farious. Baje no kuririmba n’izindi ndirimbo zabo zirimo Owooma baririmbanye n’umuhanzi w’Umugande Geosteady.
Abafana ku mbuga nkoranyambaga bagiye bagaragaza ko iki gitaramo cyitabiriwe n’abantu benshi cyane, ndetse banashyira kuri twitter amafoto yerekana ko byari bishyushye. Hari n’abandi bifashishije urubuga rwa Youtube bagaragaza uko Charly na Nina baririmbye izi ndirimbo.
