Umurusiya Roman Abramovich wari ufite Chelsea kuva mu 2003 yayishyize ku isoko aho ashaka kuyigurisha miliyali 2 z’ama-pound.
Uyu muherwe yaguze Chelsea ayitanzeho miliyoni 140 z’ama-pound.
Kuva icyo gihe yayishyizemo miliyari zisaga ebyiri n’igice z’ama-pound kugira ngo ayubake, biramuhira ayihesha ibikombe bitanu bya shampiyona, bitanu bya FA Cup, bitatu bya Football League Cup, Champions League imwe na Europa League imwe.
Daily Mail kuri iki Cyumweru yatangaje ko uyu muherwe ashaka kugurisha iyi kipe akaba yaramaze ko gushyiraho banki ya ‘New York bank Raine Group’ yo muri Leta Zunze Ubumwe za Amerika kugira ngo iyihe agaciro inamugire inama.
Iyi banki imaze kubaka izina mu gukorana n’amakipe yo mu Bwongereza kuko yafashije Umuherwe wa Manchester City kugurisha 13% by’iyi kipe kuri China Media Capital ikamuha miliyoni 265 z’ama-pound mu 2015.
Yahaye Chelsea agaciro ka miliyari ebyiri z’ama-pound (£2billion) asaga miliyari 2252 mu mafaranga y’u Rwanda.
Ntibiramenyekana niba Abramovich azagurisha iyi kipe yose cyanga azatanga imigabane imwe.
Mu mpamvu zivugwa ziri inyuma y’iki cyemezo harimo ibibazo bya politike biri hagati y’u Bwongereza n’u Burusiya.
