Perezida Kagame yageze i Kinshasa aho yitabiriye umuhango w’ishyingurwa na Etienne Tshisekedi

Ibiro by’umukuru w’Igihugu bicishije ku rukuta rwayo twa Twitter, kuri uyu wa Gatanu tariki ya 31 Gicurasi 2019, byatangaje ko  Perezida Kagame  yageze i Kinshasa, Umurwa Mukuru wa Repubulika Iharanira Demokarasi ya Congo ndetse  binatangaza ko biteganijwe ko azagirana ibiganiro na Perezida Tshisekedi ndetse akanitabira umuhango w’ishyingurwa na Etienne Tshisekedi wabaye Minisitiri w’Intebe w’iki gihugu.

Etienne Tshisekedi agiye gushyingurwa nyuma y’imyaka ibiri apfiriye mu Bubiligi ku myaka 84, umurambo we ukaba warageze i Kinshasa mu ijoro ryo ku wa Gatatu tariki ya 29 Gicurasi.

Étienne Tshisekedi yaguye ku murwa mukuru Buruseli mu kwezi kwa kabiri mu mwaka wa 2017. Abe bifuje ko ashyingurwa mu gihugu cye, ariko ubutegetsi bwa Joseph Kabila buranga kubera amakimbirane bagiranaga, umurambo we ukaba ucyuwe mu gihugu nyuma yaho umuhungu we, Felix Tshisekedi afatiye ubutegetsi.

Bwa mbere Perezida Paul Kagame yagiranye ibiganiro na Félix Tshisekedi mu kwezi kwa Kabiri, byibanze ku mubano w’ibihugu byombi, ubwo bahuriraga muri Ethiopie ku munsi wa kabiri w’Inteko rusange ya 32 y’Umuryango wa Afurika Yunze Ubumwe, AU.

Nyuma Tshisekedi yagiriye uruzinduko mu Rwanda ubwo yitabiraga inama nyafurika y’abayobozi b’ibigo, Africa CEO Forum, hamwe na Perezida Kagame bakaba bariyemeje gukorera hamwe mu kubaka umubano mushya w’u Rwanda na Repubulika Iharanira Demokarasi ya Congo (RDC) no guteza imbere abaturage b’ibihugu byombi.