The Ben na Sheebah Karungi wo muri Uganda bagiye kumara iminsi 7 muri Afurika y’Epfo bafata amashusho y’indirimbo bakoranye.
The Ben yabwiye itangazamakuru ko iyo ndirimbo barimo gukorera amashusho imaze hafi amezi ane ihari mu buryo bw’amajwi Audio. Ariko batifuje ko yajya hanze idafite amashusho.
Avuga ko gukorana na Sheebah ubu uri mu bahanzi bakunzwe cyane mu karere, bitari inyungu ze bwite. Ari umusaruro mwiza ku muziki w’u Rwanda muri rusange.
“Mu minsi itari myinshi umuziki w’u Rwanda uraza kugera ahantu hashimishije buri wese uwukunda. Ibyo nakwita ko ari inzozi tugiye gukabya nk’abahanzi nyarwanda”._ The Ben
The Ben akomeza avuga ko kudacika intege ku bahanzi nyarwanda ariyo ntwaro igiye gutuma hari aho umuziki w’u Rwanda utangira kugera ugereranyije nuw’ahandi.
Ibi nanone ngo birimo guterwa n’urukundo abanyarwanda batangiye kweraka abahanzi babo. Bitandukanye na mbere aho wasangaga indirimbo yose ishyizwe hanze hari indi bagomba kuyigereranya bavuga ko yasubiwemo gushishura.
Iyo ndirimbo ya The Ben na Sheebah yakozwe na Producer Nessim umwe mu ba producer bakomeye muri Uganda. Uyu akaba ari nawe wakoze indirimbo ya Charly & Nina Face to face, Farmer ya Ykee Benda & Sheebah n’izindi.
The Ben aheruka mu Rwanda muri Mutarama 2017 mu gitaramo cya East African Party. Icyo gitaramo kugeza ubu gishyirwa ku mwanya wa mbere w’ibitaramo byakozwe n’abahanzi b’abanyarwanda bikitabirwa ku buryo bukabije.
