None tariki ya 01 Werurwe, n’ejo ku ya 02 Werurwe 2022, urukiko rwisumbuye rw’ i Paris mu Bufaransa ruraburanisha umunyamakuru Natacha Polony, Umufaransakazi uregwa guhakana no gupfobya Jenoside yakorewe Abatutsi.
Ibyaha uyu mugore akurikiranyweho, yabikoze tariki 18 Werurwe 2018 ubwo yumvikanaga kuri Radio France Inter, avuga ko nta Jenoside yakorewe Abatutsi yabaye, ko ibyabaye mu Rwanda ari ”abasazi bari bahanganye n’abandi basazi.”
Abantu benshi bakurikiye iki kiganiro, barimo Abanyarwanda n’abanyamahanga, bandikiye ubuyobozi bwa France Inter babugaragariza agasuzuguro no kugoreka amateka y’u Rwanda byaranze Natacha Polony, maze Umuyobozi Mukuru wa France Inter, Laurence BLOCH abasubiza ko Natacha Polony yemera amakosa, nyamara Natacha Polony ubwe ntiyigeze asaba imbabazi ku mugaragaro.
Umuryango “Ibuka”, ufatanyije n’andi mashyirahamwe aharanira inyungu z’Abarokotse Jenoside yakorewe Abatutsi ndetse n’arwanya irondaruhu bahise batanga ikirego, bagendeye ku itegeko ryashyizweho mu Bufaransa muw ’2017, rihana umuntu wese uhakana akanafobya jenoside Ubufaransa bwamaze kwemera bidasubirwaho ko yabaye, harimo n’iyakorewe Abatutsi.
Kugeza n’uyu munsi Natacha Polony akomeje gupfobya no guhakana Jenoside yakorewe Abatutsi, no gusesereza ingabo za FPR-Inkotanyi zayihagaritse, akabikora abinyujije mu kinyamakuru ”Marianne” abereye Umwanditsi Mukuru.
Muri iki kinyamakuru kandi niho hanyuzwa inyandiko rutwitsi ziharabika u Rwanda, nk’iza Pierre Péan, Judi Rever, n’abandi bagome bamamaye mu guhakana no gupfobya Jenoside yakorewe Abatutsi. Inyandiko iheruka gusohoka muri ”Marianne” yatangaje ariko ikanababaza cyane abazi neza amateka y’u Rwanda, ni ivuga ko Abatutsi biciwe mu Bisesero bishwe na FPR Inkotanyi, bene iyi nyandiko birengagije amaperereza yakozwe ku rwego mpuzamahanga, akagaragaza uburyo Interahamwe zishe urw’agashinyaguro Abatutsi bari bahungiye mu Bisesero. Abakwije aya mahomvu ntibitaye ku ntera ndende cyane yari hagati ya Bisesero (yari mu gace kagenzurwaga n’ingabo za Leta), n’aho FPR yari ifite ibirindiro.
Abanyamategeko bunganira Natacha Polony muri uru rubanza, ni Jean-Yves Dupeux na Florence Bourg nabo bazwi cyane mu guhakana no gupfobya Jenoside yakorewe Abatutsi, dore ko banaburaniye Pierre Péan washinjwaga kwikoma ubwoko bw’Abatutsi, na Padiri Wenceslas Munyashyaka uregwa uruhare muri Jenoside yakorewe Abatutsi.
Abunganizi b’uruhande ruregera indishyi ni Richard Gisagara na Rachel Lindon, bagaragaje ko bashoboye imanza nk’izi, dore ko nka Me Gisagara yaburanye akanatsinda urubanza rw’umujenosideri Claude Muhayimana, urukiko rwo mu Bufaransa ruherutse gukatira igifungo cy’imyaka 14.
Natacha Polony abaye umuntu wa mbere uburanishirijwe mu Bufaransa, ku cyaha cyo guhakana no gupfobya Jenoside yakorewe Abatutsi.
