Ishami ry’Umuryango w’Abibumbye rishinzwe kugarura amahoro ryatangaje ko ingabo za Congo Kinshasa ziri mu butumwa bw’amahoro muri Centrafrique zigiye gusubizwa iwabo kandi ntihagire abandi bavuye muri iki gihugu babasimbura.
Ubuvugizi bw’ishami rishinzwe kubungabunga amahoro muri Loni buvuga ko nta ngabo nshya zivuye muri Repubulika Iharanira Demokarasi ya Congo zizongera koherezwa mu butumwa bw’amahoro bwa Loni muri Repubulika ya Centrafrique.
Ubuyobozi bw’iri shami buvuga ko uretse kuba hari impinduka bagaragaje haba mu gihe basurwaga mbere y’uko boherezwa na nyuma yaho, buvuga ko hari byinshi mu byo Loni isaba batujuje.
Nk’uko Ikinyamakuru Lemonde cyabyanditse, umuvugizi w’iri shami avuga ko kubera iyo mpamvu ingabo za Congo zizasubizwa iwabo ubudasimburwa.
Amakuru avuga ko ingabo za Congo zagaragaye mu birego bine birimo gufata abagore n’abakobwa kungufu no guhohotera abana muri iki gihugu, ariko leta ya Congo ntigire icyo ibikoraho, kugeza ubwo ku nshuro ya Kane Loni ibibamenyesha yabasabye gukora iperereza batatu bakagirwa abere.
Mu Gushyingo 2015, umwe mu bayobozi ba Loni yabwiye Lemonde ko Ban Ki-moon yashatse kwirukana ingabo za Congo kubera ibyaha ziregwa birimo guhohotera abana no kwambura abantu imitungo yabo.
Mu basirikare 11 600 bari mu butumwa bw’amahoro muri Centrafrique, Minusca, RDC ifitemo abasirikare 850, gusa igihugu kizatanga ababasimbura ntikiramenyekana.
Umwanditsi wacu
