Abantu 10 baguye mu mirwano yahuje muri iyi weekend ishize ingabo za guverinoma ya Congo n’inyeshyamba z’umutwe wa Mai-Mai Simba Mulumba ahantu hacukurwa amabuye y’agaciro hagati y’Intara ya Maniema n’Intara ya kivu y’Amajyaruguru, mu birometero nk’ijana uvuye muri centre ya Lubutu.
Amakuru aturuka aha hantu aravuga ko inyeshyamba ari zo zagabye igitero ku ngabo za leta mu giturage kirimo ikirombe cy’amabuye y’agaciro.
Izi nyeshyamba ngo zimenyereweho ibikorwa byo gusoresha abaturage no kubambura ibyabo, kuwa gatandatu ushize zateye abasirikare bal eta 3 bari bari ku irondo, nk’uko Radio Okapi dukesha iyi nkuru ivuga.
Nyuma yo guhamagarwa n’aba basirikare bari batewe, bamwe mu basirikare muri batayo ya FARDC ifite ibirindiro ahitwa Birue muri Teritwari ya Walikale, baratabaye bituma havuka imirwano ikomeye.
Amakuru ava mu gisirikare akaba avuga ko inyeshyamba 6 zishwe mu gihe izindi 2 zafashwe, hakanafatwa imbunda zo mu bwoko bwa AK-47, naho ku ruhande rwabo hakaba harishwe abasirikare bane.
