Guverinoma ya Nigeria yemereye RwandAir gutangira ingendo zigana mu murwa mukuru w’icyo gihugu, Abuja, guhera kuwa 1 Mutarama 2018.
RwandAir yemerewe kujya igera i Abuja nk’uko bigaragara mu itangazo ryashyizweho umukono n’Umuyobozi ushinzwe ubwikorezi bw’indege muri Nigeria, Eng H Musa.
Iryo tangazo rinavuga ko RwandAir yanahawe uburenganzira bwo gukomeza urugendo hagati ya Abuja na Yaoundé muri Cameroon, aho ishobora kubanza gufata abandi bagenzi.
Ayo masezerano ateganywa n’ihame rya gatanu mu icyenda arebana n’uburenganzira mu gukoresha ikirere.
Nitangira kujya i Abuja, kizaba ari icyerekezo kiyongereye kuri 24 RwandAir ikorera mu miganane itandukanye.
Kuva mu 2011 RwandAir yari isanzwe ikorera ingendo muri Nigeria, zikagarukira kuri Murtala Muhammed International Airport, mu mujyi w’ubucuruzi wa Lagos.
