I Sarajevo mu gihugu cya Bosnia Herzegovina hari gukinirwa Shampiyona y’Isi mu mukino wa Sitting Volleyball, kuri uyu wa mbere ikipe y’igihugu y’u Rwanda mu bagore batsinze ikipe ya Ukraine amaseti 3-2 (15-25,25-23,25-21,16-25-15-11).
Nyuma y’uyu mukino ikipe y’u Rwanda ikaba yahise ibona itike yo gukina imikino ya 1/4 cy’irangiza nubwo hari hategerejwe umukino waraye ukinwe mu ijoro ryo kuri uyu wa mbere n’ikipe y’’igihugu ya Hungry.
Muri uwo mukino waraye ubaye, ikipe y’igihugu y’umukino wa sitting Volleyball y’abagore yakoze amateka yo kuba ikipe ya mbere yo ku mugabane wa Afurika yaba mu bagabo cg mu bagore igeze mu mikino ya ¼ ya shampiyona y’Isi mu mukino wa sitting Volleyball idatsinzwe umukino n’umwe.
Ni nyuma y’uko ku mugoroba wo kuri uyu wa mbere itinze ikipe y’igihugu ya Hungary umukino wa nyuma wo mu itsinda A yari ihereremo amaseti 3-1(25-14,25-18, 21-25,25-21)
Usibye u Rwanda ibindi bihugu byageze muri ¼ bidatsinzwe ni ikipe ya Leta zunze ubumwe za America n’ikipe y’igihugu ya Brazil.
Ikipe y’igihugu y’abagore ikaba izakina umukino wa 1/4 hagati y’ikipe ya Slovenia na Finland bo bari bukine umukino wabo kuri uyu mugoroba 19h45, ikipe itsinda hagati yayo makipe ikaba izakina n’u Rwanda kuri uyu wa gatatu saa ine za mu gitondo.
Kuri uyu wa mbere, mu ikipe y’igihugu y’abagabo muri Sitting Volleyball batsinzwe n’ikipe y’igihugu ya Brazil ibatsinda amaseti 3-0 (21-25,15-25,18-25).
