Ubwoba bw’ibihano kuri Kayumba na RNC nyuma ya raporo y’impuguke za Loni

Iminsi mikuru isoza umwaka wa 2018 ntabwo yabereye myiza Kayumba Nyamwasa n’abambari be muri RNC kubera raporo y’impuguke za loni yabashyize hanze ku bikorwa byabo byo gushaka guhungabanya umutekano w’u Rwanda ndetse n’uw’akarere.

Kayumba Nyamwasa uyobora RNC raporo yagaragaje ko afite umutwe w’iterabwoba wiyise ‘P5’ ufite abarwanyi muri Kivu y’amajyepfo , ugizwe na Amahoro People’s Congress (AMAHORO-PC), the Forces Démocratiques Unifées-Inkingi (FDU INKINGI), the People’s Defence Pact-Imanzi (PDP-IMANZI), Parti Socialiste (PS IMBERAKURI) hamwe Rwanda National Congress (RNC).

Nubwo u Rwanda rwagiye rugaragaza imigambi y’iyi mitwe, raporo y’impuguke za Loni nayo yatanze amakuru mu buryo buhagije ndetse butomoye ku bantu bayoboye iyo mitwe, inzira bakoresha n’inkunga bahabwa n’ibihugu bimwe.

Soma inkuru bifitanye isano:

Kayumba Nyamwasa Ucumbikiwe Nk’impunzi Muri Afurika Y’epfo Akomeje Ingendo Nyinshi Muri Congo Aho Inyeshyamba Afasha Zitoreza

Ibi biri mu byatumye Kayumba Nyamwasa ashya ubwoba atangira gushakisha ukuntu yakumira ibiri muri iyi raporo abyita ibinyoma mu buryo bwo gukwepa ibihano bishobora kumufatirwa haba mu gihugu yahungiyemo haba no mu rwego rwa Loni rwagejejweho raporo y’amabi akora.

Amakuru aturuka mubari hafi ya Kayumba avuga ko yifashishije abakunze kumuba hafi Kennedy Gihana ndetse n’umuterankunga Ayabatwa Tribert Rujugiro ndetse na Himbara David umufasha kwandika za propaganda ze, abaha inshingano zo gushaka kugarura isura ya RNC no kurwanya iyi raporo iri kubagaragaza imbere n’inyuma mu mikorere yabo.

Rujugiro Ayabatwa Tribert

Aba bagabo uko ari batatu bahawe amabwiriza cyane cyane yo guhakana ko Kayumba atigeze akorera ingendo muri Repubulika iharanira demokarasi ya Congo aho abarwanyi ba RNC bari kwitoreza nkuko raporo ibigaragaza.

Kayumba kandi yabahaye inshingano zo gutangaza ko ntaho bahuriye na Col Shyaka Nyamusaraba, Capt Sibomana ‘Sibo’ Charles ndetse na Maj Habib Mudhathiru bayoboye izi nyeshyamba ze. Ikindi yabahayemo inshingano ni uguhakana ko RNC ishakisha abarwanyi mu bihugu byo mu karere ikanabashakira inzira zijya Congo baciye muribyo bihugu.

Soma uko RNC na FDLR bihabwa ubufasha n’ibihugu bituranye n’u Rwanda:

Uko Museveni Akomeje Guhuza RNC Na FDLR Akanabafasha Kwinjiza Abarwanyi Babo Mu Burundi Na Congo Ngo Begere U Rwanda Mu Migambi Yo Kurutera

Amakuru yizewe avuga ko iyi propaganda ya Kayumba yitezwe muri iyi minsi, icishijwe mu binyamakuru bimwe na bimwe birimo The Daily Mavericks cyandikirwa muri Afurika y’epfo aho Kayumba acumbikiwe nk’impunzi.

Igitangazamakuru kimenyereweho kuba gitangaza amakuru ya RNC no ku mubano w’u Rwanda na Afurika y’epfo ariko batiza umurindi Kayumba Nyamwasa.

Twabibutsa ko iki gitangazamakuru aricyo kiri inyuma y’itangazwa ry’inkuru nyinshi ku mubano w’ibi bihugu byombi ndetse n’inkuru zagiye zivugwa kuri Ministiri w’ububanyi n’amahanga Lindiwe Sisulu wagiranye ibigabiro byihariye na Kayumba Nyamwasa akanamwishimira.

Gihana na Himbara bakomeje guterwa utwatsi aho bageraga hose bashaka gukuraho icyasha Kayumba n’inyeshamba ze zagaragajwe muri raporo y’impuguke za Loni. Himbara ntiyaburiye hose kuko agikomeza gusaza imigeri akoresheje blog ye ndetse na konti ye ya Facebook.

Si iyi raporo yo muri 2018 ivuga kuri Kayumba Nyamwasa n’inyeshyamba ze kuko no muri 2010, raporo y’impuguke za Loni yatangarije Inama y’Umutekano y’uwo muryango ko Kayumba na Karegeya bakorana na FDLR n’indi mitwe y’inyeshyamba ikorera mu Burasirazuba bwa Repubulika Iharanira Demokarasi ya Congo, ibyo bikaba byaraje gushimangirwa n’inama y’umutekano y’ibihugu byo mu Karere k’ibiyaga Bigari.

Twabibutsa ko muri 2011, Kayumba, Karegeya, Rudasingwa na Gahima bakatiwe n’Urukiko Rukuru rwa Gisirikare igifungo cy’imyaka 20 ku byaha bitandukanye birimo gushaka guhungabanya umudendezo wa rubanda, gukoma mu nkokora leta, gutuka Perezida wa Repubulika no guhembera amacakubiri. Kuri Kayumba na Rudasingwa hiyongeraho igifungo cy’imyaka 4 ku cyaha cyo gutoroka igisirikare, bakaba baranambuwe impeta zose za gisirikare.

Himbara yatangiye kubona ko gahunda ya Kayumba yo gukoresha itangazamakuru rya Afurika y’epfo n’irindi bisangaho bitazatanga umusaruro, dore impuguke za Loni zasabye leta ya Afurika y’epfo mu buryo bwemewe (officiel) amakuru kubyakusanijwe kuri Kayumba cyane cyane ingendo ze akorera muri Congo no mu bihugu byo mu karere.

Hari ibimenyetso simusiga bitazatuma leta ya Afurika y’epfo yirengagiza ubusabe bw’impuguke za Loni. Ibi rero biri gutuma Kayumba n’inkoramutima ze bashya ubwoba bibaza ibigiye gukurikira bishobora no kubaviramo gufatirwa ibihano bikarishye  kubera amabi bakora abangamira umutekano w’akarere k’ibiyaga bigari.