Umunsi wa 10 shampiyona y’u Rwanda wakinwe kuri uyu wa gatatu tariki ya 22 Ukuboza ndetse urakomeza kuri uyu wa kane, waranzwe no gutungurana cyane ku bibuga bitandukanye aho hatsinzwe ibitego 14 mu mikino itanu yakinwe.
Mu byaranze uyu munsi ni uko umutoza mukuru w’ikipe ya Gicumbi FC Ghislain Tchiamas asezeye kuri uyu mwanya yari amazeho iminsi 42 yonyine, ibi byabaye nyuma yaho ikipe ye itsindiwe na Etincelles FC i Rubavu ibitego 2-0.
Mu kiganiro twagiranye n’umuyobozi wa Gicumbi mu gitondo cyo kuri uyu wa kane, yavuze ko kugeza ubu uyu mutoza ntabwegure bwe babonye, ashimangira ko akiri umutoza wa Gicumbi FC.
Ahandi ni mu mukino wahuje ikipe ya Etoile de l’Est yo mu karere ka Ngoma yari yakiriye ikipe y’ingabo z’igihugu ya APR FC ho umutoza mukuru Adil Erradi ndetse n’umwungiriza we Jamel Eddine Neffati ndetse na Hassan Taeb umutoza w’abatoza b’abazamu muri APR FC batatoje kuri uyu mukino kubera uburwayi.
Mbere y’uko uyu mukino ukinwa bikaba byavugwaga ko banduye Koronavirusi, ariko nyuma y’umukino banganyijemo na Etoile de l’Est ibitego 2-2 umutoza Mugabo Alexis usanzwe utoza abanyezamu wanatoje kuri uyu mukino yavuze ko barwaye mu nda.
Ku wundi mukino wabereye kuri sitade ya Kigali i Nyamurambo, Rayon Sports yahatsindiye ikipe ya Police FC igitego kimwe ku busa cyatsinzwe na Leandre Willy Onana, muri uyu mukino kandi umutoza wa Police FC Frank Nuttal akaba atawutoje kuko yanduye Covid-19 bityo Kirasa Alain umwungirije akaba ariwe watoje uyu munsi.
Uko umunsi wa 10 wagenze:
Gorilla FC 0-1 Mukura VS&L
Rayon Sports FC 1-0 Police FC
Etoile de l’Est 2-2 APR FC
Musanze FC 5-1 Marine FC
Etincelles FC 2-0 Gicumbi FC
Imikino itegerejwe uyu munsi:
Espoir FC vs Bugesera FC, Rusizi Stadium – 15.00
Gasogi United vs AS Kigali, Kigali Stadium – 12.30
Kiyovu SC vs Rutsiro FC, Kigali Stadium – 15.00
