Club Africain yo muri Tunisia yageze mu Mujyi wa Kigali aho ije gutangira urugendo rw’igikombe cya CAF Champions League ihangana na APR FC.
Mu rukerera rwo kuri uyu wa Mbere tariki 26 Ugushyingo 2018 iyi kipe yageze ku kibuga cy’indege mpuzamahanga cya Kigali i Kanombe n’indege ya Turkish Airlines yahageze saa 01:15.
Iyi kipe igizwe n’abantu 30 yageze mu Rwanda ifite icyizere cyo kuhakura amanota atatu mu mukino bazahanganamo na APR FC kuri uyu wa Gatatu tariki 28 Ugushyingo 2018 mu ijonjora ry’ibanze ry’irushanwa rihuza amakipe yabaye aya mbere iwayo CAF Champions League, umukino ubanza uzabera kuri Stade ya Kigali.
Chiheb Ellili utoza Club Africain yabwiye Itangazamakuru ko ikibazanye mu Rwanda atari umusaruro mwiza ahubwo ari ugutsinda byanze bikunze.
Ati “Twakiriwe neza aha mu Rwanda kandi birafasha abakinnyi banjye bakiri bato kwitegura neza umukino. Tuzi neza ikipe tuzahangana nayo, ni ikipe izi guhererekanya umupira kandi ikina umukino unogeye ijisho. Ntekereza ko nabo bazi aho dukomeye n’aho dufite integer nke. Si umukino uzaba woroshye ariko kuko turi ikipe ikomeye kurushaho tuje hano gushaka amanota atatu yose si umusaruro mwiza gusa.”
Uyu mutoza yasubiyemo inshuro nyinshi ko ashimira uburyo ikipe ye yakiriwe mu Rwanda kuko mu baje kuyakira harimo n’umukozi wa FERWAFA ushinzwe amarushanwa Nzeyimana Félix.
Biteganyijwe ko iyi kipe yo muri Tunisia izakora imyitozo kuri stade regional ya Kigali, ikibuga kizakira umukino kuri uyu wa kabiri tariki 27 Ugushyingo 2018 saa 15:30.
