Ikipe ya Real Madrid yo mu gihugu cya Esipanye yaraye igeze muri 1/2 cy’irushanwa rya UEFA Champions League nyuma yaho isezereye ikipe ya Liverpool yo mu Bwongereza ku giteranyo cy’ibitego 3-1 mu mikino yombi.
Mu mukino wo kwishyura wa 1/4 wabereye mu gihugu cy’u Bwongereza ikipe ya Liverpool yari yakiriyemo ikipe ya Real Madrid warangiye amakipe yombi anganyije ubusa ku busa, bityo ikipe ya Real Madrid isezerera iyo kipe ku giteranyo cy’ibitego 3-1 kuko ari nabyo bitego byari byabonetse mu mukino ubanza wabere muri Esipanye.
Kunganya uyu mukino kw’ikipe ya Real Madrid byayihesheje gukomeza mu kindi cyiciro cya UEFA Champions League, ibi buvuze ko yageze muri ½ kizakinwa tariki ya 27 Mata n’iya 4 Gicurasi 2021, aha Real Madrid ikazahura na Chelsea yo yasezereye ikipe ya FC Porto ku wa kabiri w’iki cyumweru.
Undi mukino wa ¼ wabaye ku wa Gatatu, wasize Manchester City nayo igeze muri ½ isezereye ikipe ya Borussia Dortmund yo mu Budage nyuma yaho iyitsindiye ibitego 2-1 mu mukino wabaye mu ijoro ryo kuri uyu wa gatatu.
Ku ruhande rwa Dortmund bari bakiriye Man City, bafunguye amazamu ku gitego cyari gitsinzwe na Bellingham ku munota wa 15, ndetse igice cya mbere kirangira uko. Mu gice cya kabiri Man City yaje yahinduye isura ku munota wa 55 Mahrez atsinda igitego cyo kunganya naho ku munota wa 75 Foden atsinda igitego cy’insinzi umukino urangira uko.
Ikipe ya Manchester City yo mu Bwongereza yahise igera muri ½ kizakinwa tariki ya 27 Mata n’iya 4 Gicurasi 2021, aha City ikazahura na PSG yo yasezereye ikipe ya Bayern Munichen ku wa kabiri w’iki cyumweru.
