Mu ijoro ryo kuri uyu wa Kabiri, ubuyobozi bw’ikipe y’Ingabo z’igihugu ya APR FC, bwashimiye byimazeyo abayoboI bakuru b’Ingabo z’Igihuguye basuye iyi kipe mu myitozo.
APR FC yitegura gukina umukino wo kwishyura w’Amarushanwa Nyafurika ku makipe yabaye ayambere iwayo, CAF Champions League yasuwe n’uwahoze ari Chairman wayo.
Binyize ku rubuga rwa X, rwahoze rwitwa Twitter, iyi kipe yatangaje ko Umugaba mukuru w’Ingabo z’u Rwanda, Gen Hadj Mubarakh Muganga ndetse n’umugaba mukuru w’Ingabo zirwanira ku butaka, Maj Gen Vincent Nyakarundi basuye ikipe.
Mu butumwa batangaje, APR FC yagize iti “Ubuyobozi bwa APR FC, Abatoza, Abakinnyi ndetse n’Abakozi Muri Rusange burashimira byimazeyo Umugaba mukuru w’Ingabo z’u Rwanda, Gen Hadj Mubarakh Muganga ndetse n’umugaba mukuru w’Ingabo zirwanira ku butaka, Maj Gen Vincent Nyakarundi ku ruzinduko bagiriye ku kibuga cy’imyitozo cya Shyorongi.”
Bakomeza bashima ubuyobozi, bati “Kudushyigikira kwanyu bisobanuye byinshi kuri twe. Bidutera Ishema, Ishyaka, Umuhate n’Umurava umunsi k’umunsi bigatuma dukora cyane nta kujenjeka.”
Aya makipe yombi aritegura gukina umukino wo kwishyura uzakinwa tariki ya 24 Kanama 2024 uzabera i Kigali, kuri Stade Amahoro.
Umukino Ubanza wabereye muri Tanzania, Azam FC yari yatsinze APR FC 1-0.
