Umukuru w’Igipolisi cya Uganda, IGP Martin Ochola, yasenye umutwe kabuhariwe w’abapolisi uzwi nka Flying Squad Unit, ashinga urundi rwego ruzajya rukurikirana ibyaha byateguwe (organized Crime department) ruzaba rugenzurwa na none n’Umutwe udasanzwe w’ubugenzacyaha.
Uyu mutwe ukaba usenywe nyuma y’amezi hafi abiri ashize IGP Ochola atangiye inshingano zo kuyobora Igipolisi cya Uganda, umwanya yagiyeho asimbura Gen Kale Kayihura.
Amakuru yizewe aturuka mu nzego zo hejuru agera ku rubuga Spyreports dukesha iyi nkuru, aravuga ko iki cyemezo cyo gusenya umutwe wari ugizwe n’abapolisi kabuhariwe mu kurwanya ibyaha cyatangarijwe ubuyobozi bukuru bw’igipolisi kuri uyu wa Mbere, itariki 07 Gicurasi 2018.
Itangazo ryashyizwe ahagaragara nyuma ryakurikiwe n’irindi rivuga ko ACP Herbert Muhangi, wari komanda wa Flying Squad, yahise agirwa umuyobozi w’urwego rushinzwe ubugenzuzi n’abakozi mu gipolisi.
Iryo tangazo rikaba rikomeza rivuga ko Mark Odong, wari umaze ibyumweru bibiri agizwe umuyobozi w’urwego rudasanzwe rw’ubugenzacyaha (SID) ari we ugiye kuyobora Urwego rushinzwe gukurikirana ibyaha byateguwe.
Uru rwego rudasanzwe rw’ubugenzacyaha rukaba kuri ubu rwahawe Joseph Obwona.
Iyi nkuru irakomeza ivuga ko abakoreraga muri Flying Squad bose basabwe kwitaba ku rwego rw’ubugenzacyaha rwa polisi ruzwi nka CID ku cyicaro cya Kibuli bitarenze kuwa 16 Gicurasi 2018 ngo bamenyeshwe ahandi bazoherezwa gukorera.
