Mugisha Samuel ukinira Team Rwanda yegukanye isiganwa mpuzamahanga rizenguruka igihugu (Tour du Rwanda) ryasojwe kuri uyu wa 12 Kanama 2018.
Mugisha w’imyaka 20 yafashe umwenda w’umuhondo nyuma yo kwegukana agace ka kabiri ka Tour du Rwanda ka Kigali -Huye ku ntera ya Kilometero 120.5, arawugumana kugeza yegukanye irushanwa.
Uyu mukinnyi yegukanye Tour du Rwanda nyuma y’iminsi umunani we na bagenzi be bazenguruka mu bice bitandukanye by’igihugu. Agace ka nyuma kakinwe uyu munsi kegukanywe n’Umunya-Algeria Azzedine Lagab (yanatwaye aka Mbere ka Tour du Rwanda 2018 kazengurutse mu Karere ka Rwamagana).
Ku rutonde rusange, Mugisha Samuel yakurikiwe na Uwizeye Jean Claude ukinira POC Côte de Lumière yo mu Bufaransa na Hailemichael Mulu ukomoka muri Ethiopia.
Mugisha usanzwe ukinira Ikipe ya Dimension Data yo muri Afurika y’Epfo yabaye Umunyarwanda wa Kane utwaye Tour du Rwanda nyuma ya Ndayisenga Valens (ufite ebyiri mu 2014 na 2016), Nsengimana Jean Bosco (2015) na Areruya Joseph (2017).
