Ishyirahamwe ry’umupira w’amaguru mu Rwanda FERWAFA, ryamaze gutangaza ko ryabonye umunyamabanga mushya ariwe MUHIRE Henry Brulart waje kuri uyu mwanya asimbuye Uwayezu Francois Regis wari wasezeye kuri uyu mwanya mu kwezi k’Ugushyingo.
Ubwo hari ku itariki ya 12 Ugushyingo 2021 nibwo uwari umunyamabanga mukuru wa FERWAFA Uwayezu Francois Regis yasezeye ku buyobozi bw’iryo shyirahamwe avuga ko yeguye ku bw’impamvu ze bwite nyuma y’imyaka itatu yari amaze kuri izo nshingano.
Binyuze ku rubuga rwa Twitter rwa FERWAFA, bemeje aya makuru bagira bati “Muhire Henry Brulart yahawe inshingano zo kuba umunyamabanga mukuru wa FERWAFA, afite inararibonye ndetse n’uburambe bw’imyaka 10 mu bikorwa bifitanye isano n’umupira w’amaguru.”
Umunyamabanga mushya wa FERWAFA Muhire Henry ahawe izi nshingano nyuma yaho yu mugabo yigeze kuba umunyamakuru w’imikino binyuze kuri Radio Flash FM hagati ya 2006 na 2011.
Nyuma yaho yerekeje mu gihugu cy’u Buhinde gukomereza amasomo ye,kuri ubu afite impamyabumenyi y’icyiciro cya Kabiri n’icya Gatatu cya Kaminuza mu bijyanye n’Ubumenyi bwa Muntu n’Iterambere (Arts in Population Studies and Development) yakuye muri Kaminuza ya Annamalai mu Buhinde.
