Ikipe y’igihugu y’u Rwanda y’abagore yitwaye neza itsinda iya Reta Zunze Ubumwe za Amerika ku kinyuranyo k’inota rimwe mu mukino wa gatanu w’irushanwa rya ICC Women’s Challenge Trophy.
Muri uyu mukino, u Rwanda ni rwo rwatsinze tombola (toss), ruhitamo gutangira rukubita udupira (batting) rugamije gushyiraho amanota menshi ashoboka. Ikipe ya Reta Zunze Ubumwe za Amerika yatangiye ijugunya udupira (bowling) ishaka kugabanya amanota y’u Rwanda.
Igice cya mbere cy’umukino (first innings) cyarangiye u Rwanda rushyizeho amanota 127, mu gihe Amerika yari imaze gusohora abakinnyi bane b’u Rwanda (wickets 4).
Mu gice cya kabiri, Amerika yasabwaga amanota 128 ngo ibe yatsinda umukino. Umukino wageze mu bihe bikomeye cyane aho hasigaye udupira 6 (over imwe), Amerika isabwa amanota 7 ngo itsinde. Kapiteni w’u Rwanda, Marie Diane Bimenyimana, yitwaye neza cyane muri iyo over ya nyuma, abasha kubuza Amerika kugera ku ntego yayo.
Umukino warangiye Amerika ishyizeho amanota 126, imaze gusohorwamo abakinnyi batanu (wickets 5), bituma u Rwanda rwegukana intsinzi ku kinyuranyo k’inota rimwe.
Muri uyu mukino, Gisèle Ishimwe w’u Rwanda ni we wabaye umukinnyi mwiza w’umukino (Player of the Match).
