Kuri uyu wa mbere tariki 28 Kamena 2022, ikipe ya Rayon Sports yaraye yegukanye umwanya wa gatatu mu mukino w’igikombe cy’Amahoro itsinze Police FC ibitego bine ku busa birimo bibiri bya Musa Esenu, Muhire Kevin na Ishimwe Kevin.
Ni umukino wabereye kuri Sitade ya Kigali i Nyamirambo, uyu mukino kuri buri ruhande wari watojwe n’abatoza bungirije kuko kuri Rayon Sports uwari umutoza mukuru Paxiao yatandukanye na Gikundiro naho Frank Nuttal utoza Police FC we yari yagiye mu bihuruko iwe mu rugo.
Mu kwitegura uyu mukino Rayon Sports yari yakoze imyitozo ibiri gusa mbere yo gukina uyu mukino bitandukanye na Police FC yari imaze icyumweru mu myitozo, byarangiye Gikundiro itsinze uyu mukino ndetse inegukana miliyoni 3 Frw.
Igice ca mbere cyarangiye amakipe yombi anganyije ubusa ku busa, gusa mu gice cya kabiri Rayon Sports yafunguye amazamu ku munota wa 47 ku gitego cyinjijwe na Muhire Kevin, iki cyakurikiwe n’ikindi cyatsinzwe na Ishimwe Kevin kuri Penaliti nyuma y’ikosa Bakame yari akoreye Musa Esenu.
Ubwo umukino wagana ku musozo, rutahizamu Musa Esenu yatsinze igitego cya gatatu ku munota wa 83 ndetse nyuma y’umunota wa mbere w’inyongera, atsinda ikindi gitego cya kane.
Mbere y’Uyu mukino wahuje Rayon Sports na Police FC, Mu bagore hakinwe umwanya wa gatatu wegukanywe na APAER WFC itsinze Bugesera WFC ibitego 4-1.
Kuri uyu wa Kabiri tariki ya 28 Kamena 2022, haraba umukino wa nyuma w’igikombe cy’Amahoro mu bagore, ikipe ya AS Kigali irakina na AS Kamonyi ku isaha ya saa cyenda n’igice naho saa kumi n’Ebyiri, APR FC irakina na AS Kigali.
