Ubushinjacyaha bwa Suwede bwemeje ko hari Umunyarwanda ugiye kwitaba ubutabera, kubera ibyaha bya Jenoside yakorewe Abatutsi mu Rwanda akurikiranweho.
Ubutabera muri iki gihugu buvuga ko uyu mugabo utaratangazwa amazina ye ariko ufite imyaka 49, akurikiranweho ibyaha bya Jenoside.
Umushinjacyaha avuga ko uyu mugabo wahanahawe ubwenegihugu bwa Suwede, yagize uruhare mu bwicanyi, gufata ku ngufu no gushimuta Abatutsi agamije kubamara.
Itangazo ry’Ubushinjacyaha muri Suwede, rivuga ko uyu mugabo afatwa nk’uwakoze Jenoside cyane cyane muri Mata na Gicurasi 1994, nk’uko ibitangazamakuru birimo ABC bibivuga.
Ubushinjacyaha buvuga ko tariki ya 12 Nzeri uyu mwaka, uyu mugabo agomba kugezwa imbere y’ubutabera mu Mujyi wa Stockholm.
Ubushinjacyaha kandi buvuga ko bwakoze iperereza mu Rwanda inshuro zitandukanye, abatangabuhanya barenga 100 barabajijwe byaba mu Rwanda, i Burayi no muri Amerika ya Ruguru.
Muri Gicurasi 2016, undi munyarwanda Claver Berinkindi nawe ufite ubwenegihugu bwa Suwede yahamijwe gufungwa burundu kubera ibyaha bya Jenoside, no mu mwaka wa 2013 undi munyarwanda Stanislas Mbanenande yari yahamijwe gufungwa burundu.
